Cakεda minnu ɲεsinnen bε bugunnatigεsεbεn biyometiriki basigilen dilanni, a dili u tigiw ma, olu bε wulikajɔ bεε la, min b’a to u ka se ka sarati dalen labato. Wa a kow taacogo ka ɲi u bolo. Nin kunnafoni in sɔrɔla mara ni desantaralizasɔn minisiri Kolonεli Abudulayi Mayiga ani basigi ni siwiliw lakananni minisiri Zenerali Dawudi Ali Mohamedini ka kunnafonidilajε senfε, min kεra kunun alamisa utikalo tile 31 san 2023.
O kunnafonidilajε kuncεra ni bugunnatigεsεbεn dilannenw lamara mangasa fila lajεli ye. O kun ye ka kunnafoni kolonw nkalontigiya sεmεntiya sεbεn in kunkanko la, min nafa ka bon jamanadenw bolo kosεbε, ni bεε hami y’a sɔrɔli ye.
Sεbεn suguya min don, a tε se ka bayεlεma mɔgɔ wεrε fε ; wa nafa caman b’a la. A bε kalatasεbεn ni kariti Nina jɔyɔrɔ fa. Basigi ni siwiliw lakananni, mara ni desantaralizasɔn ani kɔkankow ni diɲε tɔnbaw cε koɲεnabɔ minisirisow sen b’a dili baaraw la. Jεkulu kεrεnkrεnnen sigilen bε sεbεn in dili kama a tigiw ma ; o bε kε kalata jεkulu kεrεnkεrεnnnen (Aige) ka kɔlɔsili kɔnɔ. O minisiriso saba minnu kofɔra, o bεε tɔgɔlamɔgɔ bε sεbεnw dili jεkulu in kɔnɔ. O jεkulu in bε sεbεnw dicogo kɔlɔsi hali kɔkan.
Zenerali Dawudi Ali Mohamedini ka ɲεfɔli la, kɔkankow ni diɲε tɔnbaw cε koɲεnabɔ minisiriso sendonyɔrɔ ye sεbεnw laseli ye jamanaw na, Maliden hakε ka ca minnu na. Mara ni desantaralizasɔn ani « Aige » sendonkun y’a la kalatasεbεnko fanfεla ye. Mɔgɔ kelenna bugunnatigεlen don a ka bugunnatigεsεbεn biyometiriki basigilen kan.
Bugunnatigεsεbεn biyometiriki basigilen dilanni bε sira ɲuman kan. Don o don u bε sεbεn 69.000 de dilan. A ko bε cakεda min bolo lafiya yεrε t’a ma o bε kalo damadɔ bɔ sisan, a bε baara kε dɔgɔkun tile 7 bεε la. Sabula a ɲininna a fε, a k’a jilaja ka dɔ fara sεbεn dilanta hakε kan tile kɔnɔ, min b’a to laɲinin fɔlɔ ye sεbεn miliyɔn 8 min ye, o ka se ka sabati a tuma na. Dɔwεrε dun ma se ka dilan fɔlɔ sεbεn 5 ni kɔ kɔ. Nka minisiri ka fɔ la, a jigi b’a kan ko a tɔ miliyɔn 3 bεna se ka dilan sεtanburukalo in na.
Sεbεnw dili jεkulu fana b’a kan. Bamakɔ ani jamana marayɔrɔ caman bε k’u ka sεbεnw sɔrɔu. Marayɔrɔ minnu yɔrɔ ka jan Bamakɔ la, olu taw bε ka taa pankurun fε. Mali ka lasigidenso an’a ka kɔnsula bε jamana o jamana kan, bugunnatigεsεbεn biyometiriki basigilen bε ka taa yen.
Nka sεbεndilannaw ni dilijεkulu ka wulikajɔ n’a ta bεε, mɔgɔw yεrε tε ka bɔ kosεbε fɔlɔ, ka taa u ka sεbεnw minε u sɔrɔyɔrɔw la. Misali la, Bamakɔ sεbεn mumε 1.192.090 min bε bolo kɔrɔ, 109.643 dɔrɔn de minεna u tigiw fε. Sεbεnw bε minε yɔrɔ minnu na, o ye kominiw faabaw, arɔndisemanw, polisisow, zandaramasow, ani dugutigi dɔw ka so kinw kɔnɔ ; yɔrɔ yamaruyalen wεrεw b’o la, mara ni desantaralizasɔn minisiri ka fɔ la.
Sεbεn suguya minnu bε kε ka bugunnatigεsεbεn biyometiriki basigilen labɔ, minisiri seginna k’olu dantigε. O bεε bε se ka sεgεsεgε ni tabilεti ye. I dan ye ka kariti NiNA, karadante, bolifεn bolili yamaruyasεbεn, walima pasipɔri jira. Sεbεn in bε minε fu la, wari tε minε mɔgɔ si bolo a diyɔrɔ la. Malidenw bε se ka kala ta n’u ka bugunnatigεsεbεn biyometiriki basigilen ye kalata nataw la.
Dɔkala Yusufu JARA
-.
-.
Les Forces armées maliennes (FAMa) ont repoussé, avec succès, une attaque terroriste survenue sur l’axe Kayes-Bamako. L’incident s’est produit alors qu’elles menaient une mission de sécurisation des personnes et des biens le long de cet important corridor routier.
Dans le cadre des opérations de surveillance aérienne et sur la base de renseignements exploités, les Forces armées maliennes (FAMa) ont mené, ce dimanche 14 septembre 2025, une frappe aérienne réussie contre un objectif terroriste situé à Dogofry, dans la Région de Ségou..
La cérémonie de sortie officielle de ces officiers a eu lieu ce vendredi dans l'enceinte de l’École militaire interarmes (Emia) de Koulikoro..
Les vecteurs aériens des Forces armées maliennes (FAMa) ont traqué, dans la localité de Tibezas (Région de Kidal), un groupe terroriste à bord d’un pickup..
