Burukina Faso sɔrɔdasiw ɲεmɔgɔba Kolonεli-Mazɔri Selεsitεn Sinpore tun nana taama na Mali kɔnɔ n’u ka furancεlafanga jamanakuntigi Kapitεni Ibarahima Tarawle ka yamaruya ye. O senfε, tarata utkikalo tile 29 san 2023, a ye medayidi kε Mali minisiri dɔw an’a sɔrɔdasi ɲεmɔgɔ dɔw ma.
Mali mara ani desantaralizasɔn minisiri Kolonεli Abudulayi Mayiga, lafasa ni sɔrɔdasi kɔrɔw minisiri Kolonεli Sajo Kamara, ka fara jamana basigili kunnafoniko ɲεmɔgɔba Kolonεli Modibo Kɔnε kan, « komandεri detalɔn de lɔrɔduru Burukinabε » medayi kεrεnkεrεnna ka di olu ma. Mali sɔrɔdasiw ɲεmɔgɔba Zenerali Birigadi Umaru Jara, sanfεsɔrɔdasiw ɲεmɔgɔba Zenerali Birigadi Alu Boyi Jara, ka fara Kolonεli Adama Bagayɔkɔ kan, « ofisiye de letalɔn Burukinabε » kεrεnkεrεnna ka di olu ma.
Nin medayi ninnu ye lakodɔnni taamasiyεn ye Burukina Faso faamaw fε, ka ɲεsin u badenjamana Mali ma, k’a jira k’u b’u kɔ k’u senkɔrɔmadon. Kolonεli Abudulayi Mayiga ye bonyamasegin kε nin hakilila ɲuman na furancεlafanga Kolonεli Asimi Goyita ni gɔfεrεnaman bεε tɔgɔ la, k’a sεmεntiya ko jamana fila ninnu kunko ye kelen ye. O de b’an wajibiya k’an bolo di ɲɔgɔn ma, k’an fanga kε kelen ye.
Kolonεli Abudulayi mayiga ka fɔ la, Burubina Faso ye nin waleya min kε nin ye ni lakodɔnni taamasiw dili ye, a binna Mali faamaw da kan. Nka wale ɲuman lakodɔnni a tigi ye, o ye Burukina Faso danbe kɔrɔ ye ; wa a na dɔ fara seereyaw kan.
Lafasa ni sɔrɔdasi kɔrɔw minisiri Kolonεli Sajo Kamara ye hakililajigin kε Mali ni Burukina Faso jamanakuntigiw ka laɲininw na ; n’o ye k’u fangaw fara ɲɔgɔn kan, ka barika don sɔrɔdasikulu fila ninnu ka kεtaw la, kojugubakε ni dansagonwale kεlεli la a ɲεma.
Ni hamianko ye jεɲɔgɔnya mεεnni ye si la jamana fila ninnu cε, Burukina Faso sɔrɔdasiw ɲεmɔgɔba Kolonεli-Mazɔri Selεsitεn Sinpore y’a jira, ko minnu filε u cε, ale nisɔndiyara n’olu ye furancεlafangaw fε lafiya ɲininni na. A ka fɔ la, a ɲuman ye u sɔgɔlen ka to ɲɔgɔn na ; o de bε se k’a to an ka nɔ bɔ an ka jamanaw basigiko la.
Burukina Faso sɔrɔdasiw ɲεmɔgɔba in bisimilala Mali sɔrɔdasiw ɲεmɔgɔba Zenerali Birigadi Umaru Jara fε a ka baarakεyɔrɔ la. Mali ni Burukina Faso cε jεɲɔgɔnya sɔrɔdasiya nasira la, o bε se ka jiidi sira minnu fε, ka hakilila falenw k’o kan kojugubakε kεlεcogo ɲuman na.
Burukina Faso sɔrɔdasiw ɲεmɔgɔba ka taama Mali kɔnɔ, o b’a sεmεntiya, ko jamana fila ninnu faamaw hami yεrε ye basigi sabatili ye u ka dancεw la. U ka sɔrɔdasiw bε to ka jε ka lakananbaara minnu kε, o ye hadamadenw n’u bolofεnw taakasegin nɔgɔya kosεbε. Ko wεrε minnu bε sen na Mali ni Burukina Faso cε lakananko la, u da sera o cogoyaw fana ma.
Zenerali Umaru Jara ka fɔ la, halibi, Mali ni Burukina Faso bε ka kunnawolo caman sɔrɔ kεlε la ni bolodiɲɔgɔnma ye. O bolodiɲɔgɔnma nafa kosɔn, u y’a ɲinin ka dɔ fara u fanga kan ka taa a fε ni Nizεri farali y’u kan laɲininw sabatili siratigε la.
Burukina Faso sɔrɔdasiw ɲεmɔgɔba ye jigisigi kuma fɔ ka ɲεsin jamana fila ninnu ma. A k’u bε tεmεn ni jεkabaaraw ye sigidalamɔgɔw lafiyali la. A labanna k’a ɲinin o sigidalamɔgɔw fε, u ka sɔrɔdasiw senkɔrɔmadon u seko la, an ka jamanaw basigili kama. Ka da a kan an bεε jugu ye kelen ye. O jugu sago tε dɔwεrε ye an ka jamanaw ɲagamini kɔ.
O juguw de fana ni dεmεnbaa dɔw bolo bε ɲɔgɔn bolo jamanaw kɔnɔ ani kɔkan. U b’u melenge sigidalamɔgɔ dɔw fana na, k’u ka waleya juguw kε. Kasɔrɔ n’i ye jateminε kε, a daga kolon caman bε ci o sigidalamɔgɔw de kun fɔlɔ. Fεn min ɲininnen don kojugubakεlaw fε, o ye maramafεnw bilali ye sigidalamɔgɔw ka hεrε kama.
Dɔkala Yusufu JARA
Poroze in musaka sefawari miliyari 70 bεna se k’a to dɔnni ɲɔgɔn tε sɔrɔli Lise fila ka se ka jɔ, ani an bε Lise suguya minnu lakodɔn, o saba wεrε jɔli, ka fara lakɔliw dunfεnw sɔrɔli kan. ɲεmɔgɔw baaraw nun donni na.
Soba minnu bε wele suguya (R+1), o dɔ jɔtɔ cunna ni mɔgɔw ye Banankɔrɔnin sibiridon sεtanburukalo tile 16 san 2023, mɔgɔ kelen ni tora o la ka wɔɔrɔ jogin. Bolofεn caman tiɲεna : moto Jakarata 8 b’o la. A kεra midi tεmεnnen kɔfε, zandaramaw dagayɔrɔ la Banankɔrɔnin..
Degelikaramɔgɔ Eriki Seku sεli b’a ka cεdenw dalajε bi ntεnεn sεtanburukalo tile 04 san 2023 ntolantan fila labεnw kama..
Kibaru jugu cunna Malidenw kan sibiridon sεtanburukalo tile 2 san 2023 nεgε kanɲε 10 waati la, ko Salifu Keyita « Domεngo » fatura Faransi, k’a si to san 77 la. A bangera Wɔlɔfɔbugu-Bolobana ka balon tan san 1963 AS Ereyali fε kabini a san 17..
Jamana cεfɔlaba y’a damana fangabulon ye, min bε baara kε a yεrε kolo la. San o san, a b’a ka baara kεlenw laselisεbεn dilan, min kɔnɔko dɔ ye hakεɲininw ani mɔgɔw kunkanko wεrεw ye.
Laɲinin tun ye bugunnatigεsεbεn biyometiriki miliyɔn 8 min dilanni ye baara kun fɔlɔ la, miliyɔn 5.733.428 sera ka dilan o la. Nka kɔlɔsili la, Malidenw tε ka bɔ kosεbε fɔlɔ, ka taa u ka sεbεn dilannenw minε..
