Salifu Ketiyita kεra Mali kunnawolobaa ye balontanko la jamana ka yεrεmahɔrɔnya sɔrɔlen. A ye balontan daminε « Piyeniye » la. O tun ye Wɔlɔfɔbugu ntolantantɔn ye Bamakɔ. A ye ntolan tan Sitadimaliyεn ni Ereyali fana fε, sanni a bε taa Faransi san 1967 mεkalo la. U tun b’a wele yen « sa finman ». A fɔlɔla tɔn min na yen, o kεra AS Sεntetiyεni ye. Salifu Keyita ye sangaba di Faransi ntolantan ma. U sera ka Faransi ŋanaya sɔrɔ siɲε saba, ka Faransi tɔgɔlakupu fila fana sɔrɔ.
Salifu Keyita kεra ntolantanna fɔlɔ ye ka Afiriki tɔgɔla sanubalon sɔrɔ. Halibi o bε fɔ tariku kɔnɔ. San 1970, a ye bi 140 don ntolantanko 185 kɔnɔ. Tuma min na Salifu Keyita y’a ɲinin ka Faransi bila, Sεntecεni y’a jira ko a bεna taa n’olu ka tɔn walo dɔ ye a bolo. A tilali u la, o magεlεya kosɔn. Tuma min na u y’a fatuli kunnafoni sɔrɔ, u ye bonyasegin k’a ye AS sεntetiyεni ni Walansi ka ntolantan senfε sibiri tεmεnnen in na.
Salifu Keyita ye ŋanaɲinin ntolantanw kε tɔn wεrεw fε Erɔpu kɔnɔ. I n’a fɔ Walansi, Ɛsipaɲi san 1973 ni 1976 furancεw la. A y’a tan Pɔritigali Sipɔritingi fana fε san 1976 ni 1979 furancεw la. Ka sɔrɔɔ ka taa a ka ntolantan kuncε Bɔsitɔni san 1980, Lamerikεnjamana na.
Ntolantan sεkasidonon in ye ntolan tan Mali Samatasεgεw fε siɲε 15. O ntolatan dɔ senfε n’o ye Afiriki tɔgɔla farikoloɲεnajε ye san 1965. Mali sera o finali ma. Mali sera finali fana ma san 1972 KANI na Yawunde, Kameruni jamana na. Ni mɔgɔ caman b’o lakodɔn ni « Yawunde 72 » ye. O tun ye KANIKO daminε waatiw ye Mali fε.
Tuma min na Salifu Keyita kɔseginna Mali kɔnɔ balontan dabilalen kɔfε, a y’a ɲεsin lotoliko ma. Lotoli Manden y’o misali dɔ ye Sitedinizεri kɔnɔ Bamakɔ. A labanna ka balontan kalanyɔrɔ « Salifu Keyita » dayεlε ; Mamadu Jara « Jila » ani Seyidubilen Keyita y’o kalanden ŋana dɔw ye.
Salifu Keyita kεra Mali sennantolantan tɔnba « Femafuti » ɲεmɔgɔba ye san 2005 ni 2009 furancεw la. K’a daminε san 2013 la fo ka se a fatuli ma, Salifu Keyita tun ye AS Sεntetiyεni lasigiden ye balontanko nasira la. Sεki Dukure min ye sanubalon sɔrɔ san 1994, o y’a jira o waati la, k’ale b’a ɲεmada ntolantanna ŋana min fε diɲε kɔnɔ, o ye Salifu Keyita ye. Ni Ala sɔnna, Salifu keyita suturali bε kε araba sεtanburukalo tile 06 san 2023 Ntomikɔrɔbugu Bamakɔ.
Dɔkala Yusufu JARA
Poroze in musaka sefawari miliyari 70 bεna se k’a to dɔnni ɲɔgɔn tε sɔrɔli Lise fila ka se ka jɔ, ani an bε Lise suguya minnu lakodɔn, o saba wεrε jɔli, ka fara lakɔliw dunfεnw sɔrɔli kan. ɲεmɔgɔw baaraw nun donni na.
Soba minnu bε wele suguya (R+1), o dɔ jɔtɔ cunna ni mɔgɔw ye Banankɔrɔnin sibiridon sεtanburukalo tile 16 san 2023, mɔgɔ kelen ni tora o la ka wɔɔrɔ jogin. Bolofεn caman tiɲεna : moto Jakarata 8 b’o la. A kεra midi tεmεnnen kɔfε, zandaramaw dagayɔrɔ la Banankɔrɔnin..
Degelikaramɔgɔ Eriki Seku sεli b’a ka cεdenw dalajε bi ntεnεn sεtanburukalo tile 04 san 2023 ntolantan fila labεnw kama..
Jamana cεfɔlaba y’a damana fangabulon ye, min bε baara kε a yεrε kolo la. San o san, a b’a ka baara kεlenw laselisεbεn dilan, min kɔnɔko dɔ ye hakεɲininw ani mɔgɔw kunkanko wεrεw ye.
Laɲinin tun ye bugunnatigεsεbεn biyometiriki miliyɔn 8 min dilanni ye baara kun fɔlɔ la, miliyɔn 5.733.428 sera ka dilan o la. Nka kɔlɔsili la, Malidenw tε ka bɔ kosεbε fɔlɔ, ka taa u ka sεbεn dilannenw minε..
Jamana fila ninnu y’a ŋaniya, k’u fanga kε kelen ye kojugubakε kεlεli la ; o min dagalen b’u dala a bε san caman bɔ. Burukina Faso sɔrɔdasiw ɲεmɔgɔba Kolonεli-Mazɔri Selεsitεn Sinpore ye taama min kε Mali kɔnɔ, o bε ɲεtaako sɔrɔlenw kologirinya..
