Fangabulon in ka laɲinin ye ka lajεw caya sεrεkiliw kɔnɔ, walasa ka se ka lamεnni kε a ɲεma ani ka Malidenw bilasira
San 2022 laselisεbεn jεnsεnni hukumu kɔnɔ, jamana cεfɔlaba Madamu Sanɔgɔ Aminata Male ye kunnafonidilajε kε kunun alamisa utikalo tile 31 san 2023 a dagayɔrɔ la « ACI 2000 » la Bamakɔ. Nin kunnafonidilajε in kεra a kεlen kɔ ka sεbεn in di furancεlafanga jamanakuntigi Kolonεli Asimi Goyita ani bulonba kɔnseyejεkulu kuntigi Kolonεli Maliki Jawu ma.
Jamana cεfɔlaba ka laɲinin ye mara kεcogo ɲuman ka se ka sigi senkan, min bε mɔgɔw ka hakεw labato, min lasɔrɔli ka nɔgɔ, ani mɔgɔw dalen bε min na. K’a daminε zanwuyekalo tile 1lɔ la ka se desanburukalo tile 31 ma san 2022, jamana cεfɔlaba ye mɔgɔ 5.230 bisimila k’u lamεn jamana mumε na.
A ye sεbεn 268 min sɔrɔ laɲininw kan, 195 fεsεfεsεra ka ban. A tɔ 73 fεsεfεsεli bε sen na. Sεbεn ninnu tilalen don sigidama fila ye : 23 ye laɲinin minnu ye, olu bε ɲininkaliw bolo kan ; a tɔ 50 bε ka fanga hakilila makɔnɔ. Demokarasi weleli kεnε min bε sigi san o san dsanburukalo la, n’o tubabukan daɲε surun ye (EID) ye, sεbεn 334 sɔrɔla yen ka don jamana cεfɔlaba bolo ; gɔfεrεnaman ye 28 ta olu la san 2022 desanburukalo tile 10 (EID) senfε, k’u ka lajε kokura ; ko jaabi bε di a tɔ 215 la.
Sεbεn minnu sɔrɔla jamana cεfɔlaba fε, o fanba bε boli dugukoloko ; i n’a fɔ yɔrɔ min minεna, o kunkɔrɔ musakako ani yɔrɔ falenna min na o sɔrɔbaliya. Kominiw tɔgɔla baarakεla ladoncogo fana bε laɲininw na ; n’o y’u ka « kariyεriko » ye. Suguw dili tεmεnsiraw kunkankow fana b’a la.
Ni kiiri tigεra, bεn kεra fεn min kan, o waleyabaliya, walima a waleyabaliya joona. Nin ko ninnu bε mara kεcogo kɔrɔmatigε kosεbε jamana kɔnɔ. A bε ɲinin furancεlafanga fε,a k’a hakili to o gεlεyaw furakεcogo la.
Madamu Sanɔgɔ Aminata Male ka fɔ la, ni lafaamuyali tε ka nɔ bɔ, a ɲuman ye ɲangiliw ka kε a ko dabilali la, ka kεɲε ni sariya ka dantigεcogo ye. Nka sariya kura min talen filε dugukoloko kan, o bε sɔn ka kε sababu ye ka nɔgɔyaba don dugukoloko mankanw na.
Fanga bε jamana cεfɔlaba bolo k’a fεla jira ni cakεda dɔ banna kiiri dɔ bεnkan waleyali ma. A bε se ka sεbεn ci a ma, k’a ɲinin a fε a ka bεnkan labato teliya la ; wa fo ka bεn ni sarati dalen dɔ kuntaala ye. O bεε la, ni wasa ma sɔrɔ, jamana cεfɔlaba bε bataki ci jamanakuntigi ma a ko la. Sabula fangalako gεlεya karatata bεε ɲεnabɔbaa y’ale ye.
Kalanko ni mɔgɔw cε mankanw fana bε laɲininw na ka ɲεsin fanga ma. O laɲinin dɔw bε yamaruya sɔrɔli kan k’u ka kuru sɔrɔlenw sεgεsεgε kiimεni na, ani jεnbaliya n’u ka kuru sɔrɔlen ye. Fεn min ye mɔgɔw cε mankanw ye, o laɲinin kεbaa man ca kosεbε. A tε tεmεn 2,61% kan. Nisɔngoyajirasεbεnw de ye 10,45% ye laɲininsεbεnw na. O dɔw bε boli sigidaw cε fɔɲɔgɔnkɔw kan. Tuma caman na, i b’a sɔrɔ mɔgɔ min ka kan ka ko min ɲεnabɔ, o yεrε t’o ɲεdɔn, kuma tε ko bε min kunkan.
Jamana cεfɔlaba bolofaraw bε Kayi, Kulukɔrɔ, Sikaso, Segu, Moti, Tumutu ani Gawo. Nka, a la laɲinin ye halibi, ka lajεw caya sεrεkiliw kɔnɔ, walasa ka se ka mɔgɔ caman lamεn ani ka Malidenw bilasira.
Dɔkala Yusufu JARA
Poroze in musaka sefawari miliyari 70 bεna se k’a to dɔnni ɲɔgɔn tε sɔrɔli Lise fila ka se ka jɔ, ani an bε Lise suguya minnu lakodɔn, o saba wεrε jɔli, ka fara lakɔliw dunfεnw sɔrɔli kan. ɲεmɔgɔw baaraw nun donni na.
Soba minnu bε wele suguya (R+1), o dɔ jɔtɔ cunna ni mɔgɔw ye Banankɔrɔnin sibiridon sεtanburukalo tile 16 san 2023, mɔgɔ kelen ni tora o la ka wɔɔrɔ jogin. Bolofεn caman tiɲεna : moto Jakarata 8 b’o la. A kεra midi tεmεnnen kɔfε, zandaramaw dagayɔrɔ la Banankɔrɔnin..
Degelikaramɔgɔ Eriki Seku sεli b’a ka cεdenw dalajε bi ntεnεn sεtanburukalo tile 04 san 2023 ntolantan fila labεnw kama..
Kibaru jugu cunna Malidenw kan sibiridon sεtanburukalo tile 2 san 2023 nεgε kanɲε 10 waati la, ko Salifu Keyita « Domεngo » fatura Faransi, k’a si to san 77 la. A bangera Wɔlɔfɔbugu-Bolobana ka balon tan san 1963 AS Ereyali fε kabini a san 17..
Laɲinin tun ye bugunnatigεsεbεn biyometiriki miliyɔn 8 min dilanni ye baara kun fɔlɔ la, miliyɔn 5.733.428 sera ka dilan o la. Nka kɔlɔsili la, Malidenw tε ka bɔ kosεbε fɔlɔ, ka taa u ka sεbεn dilannenw minε..
Jamana fila ninnu y’a ŋaniya, k’u fanga kε kelen ye kojugubakε kεlεli la ; o min dagalen b’u dala a bε san caman bɔ. Burukina Faso sɔrɔdasiw ɲεmɔgɔba Kolonεli-Mazɔri Selεsitεn Sinpore ye taama min kε Mali kɔnɔ, o bε ɲεtaako sɔrɔlenw kologirinya..
